AAPSK dyfishon të ardhurat nga administrimi i pasurive të sekuestruara dhe konfiskuara në vitin 2024

Agjencia për Administrimin e Pasurive të Sekuestruara dhe Konfiskuara (AAPSK) ka rritur dyfish të ardhurat e saj nga marrja me qira e pasurive të sekuestruara dhe të konfiskuara gjatë vitit 2024, krahasuar me vitin 2023. Sipas të dhënave, agjencia ka gjeneruar 159 milionë lekë nga qiradhënia e këtyre pasurive në vitin 2024, që përfaqëson një rritje prej 96.2% në krahasim me vitin 2023. Në vitin 2023, të ardhurat nga qiradhënia ishin 81 milionë lekë.

Rritja e të ardhurave është arritur falë përmirësimit të efikasitetit dhe menaxhimit më të mirë, si dhe reduktimit të shpenzimeve për administrimin e pasurive të sekuestruara dhe të konfiskuara.

AAPSK administron pasuritë e sekuestruara dhe të konfiskuara në bazë të Ligjit Nr. 34/2019 “Për administrimin e pasurive të sekuestruara dhe konfiskuara” (i ndryshuar), Ligjit Nr. 10192, datë 3.12.2009, “Për parandalimin dhe goditjen e krimit të organizuar dhe trafikimit, përmes masave parandaluese kundër pasurisë” (i njohur si Ligji Anti-Mafia), si dhe Vendimeve të Këshillit të Ministrave (VKM) që përcaktojnë procedurat e administrimit dhe përdorimit të këtyre pasurive.

Në bazë të akteteve ligjore dhe nënligjore të përmendura më sipër, AAPSK administron pasuritë e sekuestruara dhe të konfiskuara me qëllim që të gjenerojë të ardhura, kryesisht përmes dhënies me qira ose formave të tjera të shfrytëzimit nga palë të treta. Në rastet kur pasuritë janë të amortizuara ose konsiderohen të papërdorshme, ato mund të përfshihen në procedura shitjeje, por vetëm pas një vendimi të Komitetit Ndërinstitucional për Masat Kundër Krimit të Organizuar.

Për sa i përket administrimit të pasurive, AAPSK merr përsipër menaxhimin dhe dhënien me qira të pasurive të sekuestruara dhe të konfiskuara me qëllim që të gjenerojë të ardhura. Marrja me qira e këtyre pasurive kontribuon në mbulimin e shpenzimeve të administrimit dhe mirëmbajtjes së tyre. Për më tepër, të ardhurat e grumbulluara shfrytëzohen për qëllime të përcaktuara ligjërisht, duke përfshirë kompensimin e viktimave të krimit ose përdorime të tjera të vendosura nga autoritetet, si mbështetje financiare dhe/ose infrastrukturore për agjencitë e zbatimit të ligjit.

Ky mekanizëm garanton që pasuritë e sekuestruara dhe të konfiskuara të mos mbeten të papërdorura, por të shfrytëzohen për të krijuar të ardhura për shtetin dhe për qëllime të përgjithshme publike.