Aeroporti më i madh në botë do të jetë në Dubai – Vlera e investimit 35 miliardë dollarë

Në Dubai ka nisur një projekt i madh për ngritjen e një terminali të ri në aeroportin ndërkombëtar "Al Maktoum", i cili pritet të jetë më i madhi në botë. Kostoja e këtij projekti është e befasishme, shkon në rreth 35 miliardë dollarë.

Kryeministri i Dubait dhe nënpresidenti kanë bërë të ditur se ky terminal do të jetë 5 herë më i madh se aeroporti aktual, duke pritur të ketë kapacitet për 260 milionë pasagjerë në vit.

Këtë lajm të madh për industrinë e aviacionit e ka ndarë Sheikh Mohammed, në një deklaratë të bërë në rrjetin social X.

Sheikh Mohammed ka theksuar se ky projekt do të sjellë ndryshime të mëdha në sektorin e transportit ajror.

“Al Maktoum” do të shfrytëzojë teknologjitë e reja të aviacionit dhe do të presë kompanitë më të mëdha në botë në sektorin e transportit ajror.

Pasi të përfundojë, aeroporti pritet të ketë 5 pista paralele dhe 400 porta avionësh

Ky investim prej 35 miliardë dollarësh tregon ambicien e Dubait për të qenë një qendër e rëndësishme globale në fushën e transportit ajror.

Ndërtimi i një qyteti të tërë përreth tij dhe përdorimi i teknologjive të reja të aviacionit për herë të parë në këtë sektor, tregon qëndrimin progresiv të qytetit në këtë drejtim.

Një projekt i këtyre përmasave do të jetë padyshim një sfidë për brezat e ardhshëm dhe do të ndikojë në mënyrë të ndjeshme në ekonominë dhe reputacionin e Dubait në arenën globale.