AMF thellon bashkëpunimin me rregullatorët evropianë

AMF thellon bashkëpunimin me rregullatorët evropianë, duke nënshkruar një Memorandum Mirëkuptimi me Bankën Kombëtare të Hungarisë. Ky hap ka si qëllim forcimin e shkëmbimit të informacionit dhe bashkëpunimit mes Autoritetit të Mbikëqyrjes Financiare (AMF) dhe Bankës Kombëtare të Hungarisë (MNB).

Marrëveshja u nënshkrua nga Drejtoresha e Përgjithshme Ekzekutive e Autoritetit, znj. Mimoza Kaçi, dhe Zv. Guvernatori i Bankës Kombëtare të Hungarisë, z. Csaba Kandrács. Ky dokument përcakton një kuadër bashkëpunimi të strukturuar mes dy rregullatorëve financiarë, duke u fokusuar në fushat e mbikëqyrjes, me prioritet të veçantë tregun e sipërmarrjeve të investimeve kolektive.

Memorandumi i Mirëkuptimit krijon mundësi bashkëpunimi mes dy autoriteteve mbikëqyrëse, me qëllim mbrojtjen e interesave të konsumatorëve dhe investitorëve, si dhe promovimin e integritetit, stabilitetit dhe efikasitetit në tregjet që ndodhen nën mbikëqyrje.

Nënshkrimi i Memorandumit të Mirëkuptimit ndodhi pak ditë pas hapjes zyrtare të negociatave të Shqipërisë me Bashkimin Evropian gjatë presidencës hungareze, për grupkapitujt e Themelorëve. Autoriteti i Mbikëqyrjes Financiare është institucioni përgjegjës për kapitullin 9 “Shërbimet financiare” dhe kontribuon gjithashtu në një sërë kapitujsh të tjerë gjatë procesit të negociatave.