Banka e Shqipërisë: Stabiliteti financiar u ruajt në gjysmën e dytë të vitit 2024

Këshilli Mbikëqyrës i Bankës së Shqipërisë shqyrtoi dhe miratoi sot Deklaratën e Raportit të Stabilitetit Financiar për gjashtëmujorin e dytë të vitit 2024.

Banka e Shqipërisë thekson se sektori financiar ka treguar stabilitet në gjashtëmujorin e dytë të vitit 2024. Depozitat dhe kreditë kanë vazhduar të rriten, edhe pse ndikimi i mbiçmimit të kursit të këmbimit ka pasur një efekt të kufizuar. Kapitalizimi i sektorit mbeti i qëndrueshëm, ndërkohë që fitimet e tij shënuan një përmirësim të ndjeshëm. Rreziqet e operacioneve janë ende në nivele të kontrollueshme dhe sektori bankar ka mbetur i fortë ndaj tyre. Megjithatë, sfidat për sektorin bankar dhe financiar janë rritur, dhe performanca e mirë financiare duhet të shfrytëzohet nga bankat për të përmirësuar menaxhimin e rreziqeve.

Sipas Bankës së Shqipërisë, zhvillimet ekonomike gjatë periudhës ishin pozitive, të ndikuara nga rritja e konsumit dhe investimeve, si dhe nga performanca e fortë e sektorit të turizmit.

Rritja e ekonomisë shkoi paralelisht me uljen e papunësisë dhe rritjen e punësimit dhe pagave. Politika fiskale ka ruajtur një kurs konsolidimi gjatë pjesës më të madhe të vitit, në një kontekst rritjeje të konsiderueshme të të ardhurave fiskale. Inflacioni ka shfaqur një tendencë uljeje, duke i mundësuar Bankës së Shqipërisë të lehtësojë politikën monetare. Megjithatë, rreziqet për zhvillimet ekonomike dhe financiare në vend janë ende të pranishme dhe janë kryesisht të lidhura me pasigurinë dhe ndikimet e zhvillimeve ndërkombëtare. Në këto kushte, është thelbësore që politikat dhe veprimet e autoriteteve publike, si dhe të pjesëmarrësve të tregjeve, të synojnë ruajtjen e rezervave financiare për të mbështetur stabilitetin dhe mirëfunksionimin e veprimtarisë ekonomike.