Bankat shënojnë fitim prej 18.6 miliardë lekësh në fund të gjashtëmujorit

Në pjesën e parë të vitit, të ardhurat bruto nga interesat u rritën me rreth 7 miliardë lekë, duke arritur në 46.5 miliardë lekë, ndërsa shpenzimet për interesa u shtuan me 3 miliardë lekë. Rreth 85% e kontributit në rritjen e rezultatit neto nga interesat lidhet me aktivitetin në monedhën vendase. Kjo u reflektua në rritjen e marzhit neto nga interesat në 4.4%, krahasuar me 4.2% një vit më parë.

Ndërkohë, të ardhurat jo nga interesat u rritën me 3.1 miliardë lekë, duke arritur në 10.7 miliardë lekë. Pjesa më e madhe e kësaj rritjeje erdhi nga fitimet në instrumentet financiare, me një kontribut prej 2 miliardë lekësh, dhe të ardhurat nga komisionet, me 1 miliard lekë.

Fitimi neto i sektorit bankar në fund të muajit qershor arriti në 18.6 miliardë lekë, një rritje prej 26% krahasuar me vitin e kaluar. Të ardhurat neto nga interesat ishin burimi kryesor i këtij fitimi, ndonëse edhe të ardhurat jo nga interesat kontribuan në këtë rritje, falë performancës së përmirësuar të investimeve financiare.

Të ardhurat neto nga interesat u rritën me 4.2 miliardë lekë në krahasim me një vit më parë, duke arritur në 37.4 miliardë lekë. Rritja e të ardhurave nga interesat u mbështet nga rritja e investimeve në instrumente financiare dhe përmirësimi i të ardhurave nga komisionet.

Shpenzimet e veprimtarisë u rritën me 2.4 miliardë lekë, duke arritur në rreth 23.8 miliardë lekë. Megjithatë, raporti i shpenzimeve të veprimtarisë ndaj të ardhurave u ul ndjeshëm, në 49% nga 53% që ishte në periudhën e një viti më parë. Niveli i mbulimit të kostove të veprimtarisë nga të ardhurat e bankave u përmirësua dukshëm.

Paralelisht me rritjen e të ardhurave, shpenzimet e veprimtarisë dhe provigjionet shënuan gjithashtu një rritje të lehtë, duke ruajtur një balancë të qëndrueshme në raport me të ardhurat.