Bashkëpunim ndërkombëtar: Universiteti 'Luarasi' dhe London School of Economics nisin programe të përbashkëta

Universiteti "Luarasi" dhe London School of Economics po bashkëpunojnë për të ofruar programe të përbashkëta arsimore. Ky bashkëpunim ndërkombëtar sjell mundësi të reja për studentët shqiptarë, duke u mundësuar atyre të marrin njohuri nga një nga universitetet më prestigjioze në botë. Programet e përbashkëta synojnë të përmirësojnë cilësinë e arsimit të lartë në Shqipëri dhe të forcojnë zhvillimin e kurrikulave arsimore. London School of Economics ofron ekspertizën e saj akademike, ndërsa Universiteti "Luarasi" po forcon pozitën e tij si një institucion me standarde ndërkombëtare. Ky projekt është një hap i rëndësishëm për ndërkombëtarizimin e arsimit të lartë në Shqipëri dhe një shembull i suksesshëm i bashkëpunimit ndërkombëtar.

"Ky është një moment dhe një marrëveshje që meriton vëmendje nga studentët dhe familjet e tyre, si edhe nga akademia, biznesi dhe institucionet shtetërore. Kjo diplomë e dyfishtë, e lëshuar nga të dy institucionet e arsimit të lartë, u jep studentëve mundësi të reja për të përmirësuar jetën e tyre dhe për të kontribuuar në zhvillimin e një komuniteti profesional më të mirë në ditët e sotme."- shprehu guvernatori Sejko.

Më tej ai vijoi "Gjithashtu, këto programe do të rrisin profilin e akademisë në vend, duke mundësuar metoda të përmirësuara të mësimdhënies dhe hapësira të reja të kërkimit.

Programet e përbashkëta të studimit dhe ndërkombëtarizimi i tyre nga Universiteti “Luarasi” përbën në të njëjtën kohë edhe një sfidë për stafin akademik dhe drejtuesit e tij. Por, jam i bindur se suksesi do t’i ndjekë edhe në këtë përpjekje të re, ashtu siç kanë qenë të suksesshme edhe iniciativat e tjera që nga viti 2003.

Le të jetë ky bashkëpunim një shembull frymëzues për të ardhmen e arsimit të lartë në Shqipëri, duke krijuar mundësi të reja për studentët dhe duke ndihmuar në zhvillimin e një shoqërie të ditur, konkurruese dhe inovative."