Bizneset në Tiranë: Taksa e pronës paguhet me 3 këste, afati i fundit më 30 shtator

Individët me prona për përdorim tregtar në Tiranë, këtë vit, kanë detyrimin e taksës së pronës të ndarë në tre këste

Pas pagesës së dy kësteve të para në fund të prillit dhe qershorit, individët duhet të paguajnë këstin e tretë deri më 30 shtator 2024. Sipas Drejtorisë së Përgjithshme të Taksave dhe Tarifave Vendore, nuk do të ketë penalitete dhe kamatëvonesa deri në këtë afat, por në rast vonese do të aplikohen detyrime shtesë.

Metoda e pagesës me tre këste do të jetë në fuqi vetëm për këtë vit, pasi çmimet e reja të referencës në Tiranë u ndryshuan në gusht 2023, pasi periudhat deklarative ishin mbyllur. Këtë vit, individët do të përballen me një rritje të taksës për aktivitetet tregtare, për shkak të rritjes së çmimeve të referencës dhe vlerës së tregut në kryeqytet.

Bizneset mund të gjenerojnë detyrimin e tyre online përmes të dhënave të tyre për akses në sistem. Bashkia e Tiranës ka arritur performancën më të mirë në mbledhjen e taksës së pronës ndër 61 bashkitë e vendit. Në vitin 2023, Bashkia Tiranës ka mbledhur 24 milionë euro nga taksa e ndërtesës, duke përfshirë edhe njësitë e biznesit, duke shënuar një rritje krahasuar me vitin e kaluar.