Dobësimi i euros ndikon negativisht buxhetin, të ardhurat nga TVSH bien

Monedha evropiane, nga 103.88 lekë që këmbehej në fund të vitit 2023, aktualisht tregtohet me 100 lekë, duke rënë me afërsisht 4%. Ndërsa krahasuar me vitin 2022, euro është zhvlerësuar me mbi 15%.

Normaliteti i ri i kursit të këmbimit, me euron që këmbehet me 100 lekë, ka sjellë pasoja në buxhetin e shtetit. Të ardhurat e planifikuara nuk u arritën vitin e kaluar dhe plani nuk po përmbushet as këtë vit për Tatimin mbi Vlerën e Shtuar (TVSH).

Zhvlerësimi i euros ka ndikuar negativisht edhe në të ardhurat e shtetit, pasi janë mbledhur më pak fonde se sa ishte planifikuar.

Ministria e Financave ka pranuar këtë fakt, duke shpjeguar se të ardhurat nga TVSH-ja nuk janë realizuar, për shkak të forcimit të lekut dhe rënies së çmimeve në tregjet ndërkombëtare.

Efekti i zhvlerësimit të euros është prezent edhe në treguesit e këtij viti. Në gjashtëmujorin e parë të vitit, sipas të dhënave nga Ministria e Financave, të ardhurat nga TVSH-ja nuk janë realizuar sipas planit.

Nga janari në qershor u mblodhën 102.7 miliardë lekë, edhe pse në rritje krahasuar me vitin e kaluar, kjo vlerë është 251 milionë lekë më pak se plani i Ministrisë së Financave.

Gjatë vitit 2023, të ardhurat nga TVSH-ja në import arritën në 146.4 miliardë lekë, duke qenë 6.7% më pak se plani për vitin dhe 10.5 miliardë lekë më pak se në vitin 2022.

Në buxhetin faktik të vitit 2023, Ministria e Financave thekson se të ardhurat ishin planifikuar bazuar në kursin e këmbimit prej 1 euro = 120 lekë, dhe zhvlerësimi i euros ka ulur të ardhurat në buxhet.

“Gjatë vitit 2023 ka pasur një devijim të dukshëm në ulje nga ky kurs këmbimi i projektuar, që ka ndikuar ndjeshëm të ardhurat nga TVSH-ja në import," thuhet në raportin e zbatimit të buxhetit për vitin 2023.

Baza mbi të cilën llogaritet TVSH-ja në import është ndikuar jo vetëm nga rënia e çmimeve të mallrave të importuara në 2023 krahasuar me rritjen e tyre në 2022, por edhe nga ulja e vlerës mbi të cilën llogaritet TVSH-ja për shkak të kursit të këmbimit, thuhet në raportin e zbatimit të buxhetit të vitit 2023.