Duke filluar nga 9 Gushti, doganat do të administrojnë markimin e karburanteve

Sot, Këshilli i Ministrave miratoi ndryshime në ligjin për akcizat, duke kaluar përgjegjësinë e markimit dhe ngjyrimit të karburanteve te Administrata Doganore, që do të fillojë nga 9 gushti.

Kjo ndodh pas përfundimit të kontratës së koncesionit/PPP për shërbimin e markimit dhe monitorimit të karburanteve, e miratuar në maj 2013. Shërbimi u zbatua nga kompania GFI Albania që nga shtatori 2013 dhe monitorimi filloi më 23 qershor 2014.

Në gusht të vitit të kaluar, kontrata u zgjat me një vit, duke arritur një periudhë totale prej 11 vitesh, ndërsa më parë kishte një afat 10-vjeçar. Shtyrja u bë pa dhënë arsye të qarta, përveç kërkesës së Autoritetit Kontraktues.

Tarifa e koncesionit, e paguar nga konsumatorët dhe që rriti çmimin e naftës me 1 lekë për litër, ka sjellë të ardhura prej rreth 3.4 miliardë lekësh (32 milionë euro) për GFI Albania nga 2013 deri në 2021.

Për më tepër, financat vendosën të mos rinovojnë kontratën për pullat fiskale me "Sicpa Security Solutions S.A." dhe "Sicpa Security Solutions Albania sh.p.k.", e cila do të kalojë te një person i autorizuar nga Këshilli i Ministrave nga 1 janari 2025. Po ashtu, nuk u miratua koncesioni për shërbimin e infrastrukturës së çelësave publikë PKI, për shkak të shqetësimeve mbi sigurinë e prodhimit.