E Ngarkuara me Punë Nancy VanHorn vizitë në Spitalin Amerikan

E Ngarkuara me Punë Nancy VanHorn vizitoi këtë javë Spitalin Amerikan për të parë nga afër kontributin e ShBA në zhvillimin e sektorit të kujdesit shëndetësor në Shqipëri. Dr. Allajbeu prezantoi ambjentet e spitalit, duke theksuar arritjet që kanë ndodhur pas investimit të ShBA-së në vitin 2008 përmes Overseas Private Investment Corporation.

Këto investime kanë sjellë një transformim të dukshëm në Spitalin Amerikan dhe në sektorin e shëndetësisë në Shqipëri. Znj. VanHorn shprehu mirënjohjen e saj ndaj ekipit të Spitalit Amerikan për përkushtimin e treguar dhe inkurajoi bashkëpunimin e mëtejshëm me kompanitë amerikane për të promovuar inovacionin dhe për të siguruar shërbime moderne të kujdesit shëndetësor për qytetarët shqiptarë.