Energjia e shtrenjtë rrit kostot e prodhimit vendas, duke kaluar importet

Sipas të dhënave të fundit nga INSTAT, Indeksi i Çmimit të Prodhimit dhe Indeksi i Çmimit të Importit kanë shfaqur luhatje në drejtime të ndryshme. Ndërsa prodhuesit përballen me një rritje të vazhdueshme të kostove të prodhimit, importuesit kanë përjetuar një ulje të çmimeve.

Në tremujorin e dytë të vitit aktual, Indeksi i Çmimeve të Prodhimit ka shënuar një rritje prej 1.7% krahasuar me të njëjtën periudhë të vitit të kaluar. Në të kundërt, Indeksi i Çmimeve të Importit ka rënë me 1%.

Analiza nga “Scan Intel” shqyrton këto ndryshime dhe identifikon faktorët që ndikojnë në rritjen e çmimeve të prodhimit. Rritja më e madhe e çmimeve, prej 5.3%, është vërejtur në sektorin e “Energjisë elektrike, gazit, avullit dhe kondicionimit të ajrit.” Pasuar nga sektori i “Industri nxjerrëse” me një rritje prej 4%, “Industri përpunuese” me 0.4%, dhe “Furnizimi me ujë dhe menaxhimi i mbetjeve” me 0.3%.

Në brendësi të sektorit të “Industri përpunuese,” rritja më e madhe e çmimeve është regjistruar në “Prodhimin e produkteve të duhanit” me 3.8%. Nga ana tjetër, sektorët që kanë pësuar ulje të mëdha të çmimeve përfshijnë “Përpunimin e tekstileve” me 3.2%, dhe “Prodhimin e produkteve minerale jo metalike” me 2.3%.

Për sa i përket Indeksit të Çmimeve të Importit, ky tregues për tremujorin e dytë të vitit 2024 ka arritur në 108.3, që përfaqëson një ulje prej 1% krahasuar me vitin e kaluar. Një vit më parë, ky indeks kishte një rritje prej 0.2%.

Kur shqyrtohen çmimet e importit sipas sektorëve, sektori i “Industrisë nxjerrëse” ka regjistruar një ulje të çmimeve prej 1.5%, ndërsa “Industria përpunuese,” që ka peshën më të madhe në ekonomi me 93.5%, ka pësuar një ulje prej 1.2%. Ulja më e madhe brenda këtij sektori është vërejtur në “Shtypshkrimin dhe rigrupimin e mediave të regjistruara” me 6.2%, ndjekur nga “Konfeksionimi i veshjeve” me 4.6%.