Financimi në bujqësi merr shtesë 5 Milionë Euro në skemën e vitit 2024

Në vitin 2024, hyjnë në fuqi ndryshimet e skemës kombëtare të mbështetjes në bujqësi, duke sjellë financime për sektorin. Fermerët do të përfitojnë fonde për ngritjen e serave diellore, strukturave mbrojtëse kundër breshërit dhe stabilimenteve për kafshët dhe shpendët.

Sipas vendimit nr. 130, datë 6 mars 2024, i botuar në Fletoren Zyrtare, janë parashikuar disa masa mbështetëse. Masa e parë ofron financime nga 4 deri në 15 milionë lekë për ndërtimin e serave diellore për prodhimin e perimeve, rrushit dhe luleshtrydheve. Masa e dytë mbështet ngritjen e rrjetave për mbrojtje nga breshëri, duke mbuluar 50% të kostos së investimit, deri në 1,5 milionë lekë për hektar.

Masa e tretë ofron mbështetje për ndërtimin e stallave dhe stabilimenteve për kafshët dhe shpendët, me një financim prej 50% të kostos, deri në 15 milionë lekë për subjekt. Masa e katërt përfshin financime deri në 5 milionë lekë për blerjen e makinerive dhe traktorëve, duke përmirësuar mekanizimin e bujqësisë. Ndërsa masa e pestë mbështet akuakulturën, me financim deri në 20 milionë lekë për subjekt për koshat e peshkut.

Fondi i përgjithshëm për këto masa arrin në 1,5 miliardë lekë për periudhën 2024-2027, nga të cilat 500 milionë lekë janë parashikuar për vitin 2024. Fondet e papërdorura mund të rialokohen për mbështetje të mëtejshme në sektorë të tjerë.