Google adopton AI: Përmirëson kërkimet në internet!

Google ka bërë të ditur planin për të zgjeruar përdorimin e inteligjencës artificiale në motorin e saj të kërkimit në internet, duke sjellë një ndryshim të rëndësishëm që mund të transformojë mënyrën tradicionale të kërkimit dhe të prekë të ardhurat nga reklamat.

Për të integruar më shumë AI-in, kompania prezantoi një model të përmirësuar kërkimi, që shpesh do të favorizojë përgjigjet e krijuara nga inteligjenca artificiale mbi ato që gjenden në faqet e internetit tradicionale.

Drejtuesit e Google besojnë se ky ndryshim do të përshpejtojë procesin e kërkimit të informacionit dhe mund të ndikojë në trafikun e internetit që gjeneron të ardhura. Informacionet e krijuara nga inteligjenca artificiale do të shfaqen vetëm kur teknologjia e Google e përcakton se ato janë mënyra më e shpejtë dhe më efektive për përdoruesin, raportoi VOA.

Ky model pritet të zbatohet për kërkime më të ndërlikuara dhe situata ku përdoruesit po planifikojnë ose po mendojnë diçka. Faqja tradicionale e Google dhe reklamat për kërkime më të thjeshta si rekomandimet për dyqane apo parashikimi i motit do të vazhdojnë të jenë të pranishme.

Google pohon se ndryshimet janë rezultat i faktit që përdoruesit po shfrytëzojnë inteligjencën artificiale për kërkime në mënyra të reja dhe për të bërë pyetje më të gjata dhe më komplekse. Deri në fund të vitit, kompania pret që shërbimi i kërkimit të informacioneve përmes inteligjencës artificiale të përdoret nga rreth një miliard njerëz.