Guvernatori Genti Sejko takim me sistemin bankar

Nën drejtimin e Guvernatorit Sejko, Banka e Shqipërisë organizoi sot një takim me përfaqësuesit e sistemit bankar. Diskutimet u përqendruan te objektivat kryesore, ku bankat mund të orientohen për të forcuar sektorin bankar, duke rritur ndikimin e tyre në zhvillimin ekonomik të vendit. Fokus kryesor ishte financimi i projekteve efektive për bizneset dhe familjet, si dhe zgjerimi i ofertës së produkteve dhe shërbimeve financiare për publikun e gjerë.

Diskutimet u fokusuan gjithashtu në çështje të rëndësishme si promovimi i inovacionit, anëtarësimi në sistemin SEPA dhe zhvillimi i bankingut të hapur.

Guvernatori Sejko theksoi rëndësinë e transformimit digjital për sektorin bankar, duke vënë në dukje se adoptimi i vazhdueshëm i teknologjive inovative është një prioritet thelbësor. Ai nënvizoi se bankat duhet të vazhdojnë të investojnë në teknologji moderne, duke u përqendruar në ofrimin e zgjidhjeve digjitale që përmirësojnë përvojën e klientëve, adresojnë sfidat e sigurisë kibernetike dhe forcojnë besimin e tyre në shërbimet online.

Duke u bazuar në përfundimin e aderimit të Shqipërisë në SEPA (Single Euro Payments Area), si një nga vendet e para të Ballkanit Perëndimor që bëhet pjesë e kësaj zone, Guvernatori Sejko u kërkoi bankave të vijojnë përgatitjet për përmbushjen e afateve të përcaktuara. Ai theksoi rëndësinë e përgatitjes për t'u integruar plotësisht në skemat SEPA dhe ofrimin e transaksioneve për klientët deri në fund të vitit 2025. Në këtë drejtim, Guvernatori theksoi nevojën për angazhimin e sektorit bankar në investime të vazhdueshme për përmirësimin e teknologjisë, ndërtimin e infrastrukturës së nevojshme dhe trajnimin e stafit.