Guvernatori Sejko në takim me homologun e tij Holzmann: Diskutime mbi politikat monetare dhe turizmin e qëndrueshëm

Guvernatori i Bankës Kombëtare të Austrisë, z. Robert Holzmann, realizoi një vizitë zyrtare në Bankën e Shqipërisë, ku nën drejtimin e Guvernatorit Sejko, u organizua fillimisht një takim dypalësh. Gjithashtu, u mbajt një tryezë diskutimi me përfaqësues të sektorit bankar dhe drejtues të lartë të Bankës së Shqipërisë, ku u trajtuan zhvillimet më të fundit ekonomike, inflacioni në rajon dhe Bashkimin Europian, si dhe çështje të tjera me rëndësi për sistemin bankar.

Në hapje të takimit, Guvernatori Sejko shprehu mirënjohje ndaj Guvernatorit Holzmann për vizitën e tij, duke vlerësuar marrëdhëniet historike mes Shqipërisë dhe Austrisë, si në aspektin politik, ashtu edhe në atë ekonomik. Ai theksoi se investimet e huaja direkte nga Austria, të cilat përbëjnë rreth 6% të totalit të investimeve të huaja direkte në Shqipëri, janë një tregues i rëndësishëm i kësaj lidhjeje të fortë, veçanërisht në sektorin financiar. Gjithashtu, Guvernatori Sejko vlerësoi mbështetjen e vazhdueshme të Austrisë në procesin e integrimit të Shqipërisë në Bashkimin Evropian dhe shprehu bindjen se bashkëpunimi ekonomik dhe teknik mes dy vendeve mund të zgjerohet edhe më tej në të ardhmen.

Guvernatori Holzmann vlerësoi në mënyrë pozitive rolin dhe politikën monetare të kujdesshme të Bankës së Shqipërisë, e cila ka kontribuar në sigurimin të njërit ndër normat më të ulëta të inflacionit dhe një nga normat më të larta të rritjes ekonomike në rajon. Ai gjithashtu e vlerësoi angazhimin e Bankës në reforma në kuadër të integrimit evropian të Shqipërisë. Guvernatori austriak, duke ardhur nga një vend ku turizmi luan një rol kyç, theksoi rëndësinë e përqendrimit në zhvillimin e turizmit të qëndrueshëm. Ky lloj turizmi jo vetëm që sjell përfitime për mjedisin, por gjithashtu forcon komunitetet lokale dhe siguron rritje ekonomike të qëndrueshme në afat të gjatë.