Guvernatori Sejko takon Shefin e Sektorit Ekonomik Rajonal për Ballkanin Perëndimor në Ambasadën Franceze, z. Pierre Grandjouan

Më 16 tetor 2024, Guvernatori i Bankës së Shqipërisë, z. Gent Sejko, zhvilloi një takim me Shefin e Sektorit Ekonomik Rajonal për Ballkanin Perëndimor, z. Pierre Grandjouan, i cili është rezident në Ambasadën e Republikës Franceze në Beograd.

Gjatë këtij takimi, Guvernatori Sejko e informoi z. Grandjouan mbi zhvillimet ekonomike në Shqipëri, duke theksuar se rritja ekonomike po ndjek një trajektore pozitive dhe se balancat kryesore ekonomike pritet të forcohen në vitet e ardhshme.

Sa i përket inflacionit, Guvernatori nënvizoi se ai është në rënie të shpejtë dhe se ka ndodhur një rikuperim i plotë nga ndikimi i rritjes së çmimeve në tregjet ndërkombëtare. Banka e Shqipërisë ka vepruar me kujdes në politikën e saj monetare, duke analizuar të dhënat për inflacionin dhe duke reaguar për të mbajtur rritjen ekonomike pa e cenuar. Kjo qasje ka rezultuar efektive.

Politika monetare ka qenë e fleksibël, me qëllimin për të mbështetur trendet pozitive të zhvillimit të vendit, duke siguruar një harmonizim me zhvillimet financiare dhe politikën fiskale. Falë këtij reagimi, inflacioni dhe pritjet për të qëndrojnë më pranë objektivit tonë, me parashikime optimiste për të ardhmen. Aktualisht, inflacioni në Shqipëri është më i ulëti në rajon dhe në Evropë.

Në lidhje me sistemin financiar, Guvernatori Sejko theksoi se ai karakterizohet nga nivele të kënaqshme të kapitalizimit dhe likuiditetit. Ai gjithashtu u ndal në panoramën e sektorit bankar, duke përmendur dy aspekte të rëndësishme: rritjen e kreditimit dhe përmirësimin e treguesit të kredive problematike.

Z. Grandjouan e falënderoi Guvernatorin Sejko për takimin dhe vlerësoi kontributin e vazhdueshëm të Bankës së Shqipërisë në ruajtjen e stabilitetit makroekonomik të vendit. Ai gjithashtu e uroi Guvernatorin për hapjen zyrtare të negociatave për Grup-Kapitujt me Bashkimin Evropian, duke e cilësuar këtë si një moment historik për Shqipërinë në procesin e integrimit.

Z. Grandjouan vlerësoi gjithashtu rolin e Bankës së Shqipërisë në sigurimin e stabilitetit makroekonomik dhe financiar të vendit, duke nënvizuar se politikat e saj kanë ndikuar pozitivisht në ruajtjen e inflacionit më të ulët dhe rritjen më të lartë ekonomike në rajon. Ai theksoi se regjimi i lirë i kursit të këmbimit mbetet i përshtatshëm, duke u bazuar në kërkesën dhe ofertën e tregut.

Në përfundim, të dy bashkëbiseduesit ndanë të njëjtin mendim për perspektivat e rritjes së mëtejshme të bashkëpunimit ekonomik mes Shqipërisë dhe Francës, duke identifikuar mundësi në sektorë të ndryshëm si ai financiar, infrastrukturor dhe rritja e investimeve të huaja në Shqipëri.

Ata gjithashtu ranë dakord që Banka e Shqipërisë dhe Banka e Francës do të vazhdojnë bashkëpunimin në fusha si konvergjenca e legjislacionit me standardet evropiane dhe qeverisja e bankës qendrore. Banka e Francës do të ofrojë mbështetje për Bankën e Shqipërisë në përforcimin e kapaciteteve institucionale dhe adoptimin e standardeve ndërkombëtare të bankingut qendror, deri në momentin kur Shqipëria të bëhet pjesë e familjes evropiane.