Guvernatori Sejko zhvillon takim me Ambasadoren e Hungarisë në Shqipëri, Martina Kasnyik

Guvernatori i Bankës së Shqipërisë, z. Gent Sejko, zhvilloi një takim kortezie me Ambasadoren e Hungarisë në Shqipëri, Sh.S.Zj. Martina Kasnyik.

Gjatë bisedës, Guvernatori Sejko vlerësoi marrëdhëniet e shkëlqyera historike mes Shqipërisë dhe Hungarisë, duke theksuar edhe bashkëpunimin e suksesshëm mes dy vendeve në fusha të ndryshme.

Guvernatori Sejko e informoi Ambasadoren Kasnyik mbi zhvillimet më të fundit ekonomike në Shqipëri, duke theksuar se ekonomia e vendit vijon të ndjekë një trend pozitiv dhe pritet të rritet me ritme të qëndrueshme. Ai shpjegoi se politikat ekonomike janë përqendruar në ruajtjen e stabilitetit të çmimeve, përmes përshtatjes së qëndrimit të politikës monetare , një element thelbësor për garantimin e stabilitetit financiar.

Sa i përket sektorit bankar, Guvernatori theksoi se bankat në Shqipëri mbeten të mirëkapitalizuara, likuide dhe fitimprurëse, me një nivel të ulët të kredive me probleme. Ai shtoi se kjo performancë e qëndrueshme reflekton besimin në sistemin financiar dhe aftësinë e tij për të mbështetur rritjen ekonomike afatgjatë.

Guvernatori Sejko theksoi kontributin pozitiv të sistemit bankar dhe të investimeve hungareze në këtë sektor, duke vlerësuar mbështetjen që ato kanë dhënë për iniciativat e Bankës së Shqipërisë dhe për rritjen ekonomike të vendit. Ai e cilësoi këtë prani si një “urë” lidhëse për investime dhe përvoja moderne evropiane në Shqipëri.

Në vijim, Guvernatori u ndal te procesi i integrimit evropian të Shqipërisë, duke theksuar se mbështetja e vendeve anëtare të BE-së, si Hungaria, ka një rëndësi të veçantë për avancimin e këtij procesi dhe për arritjen e anëtarësimit të plotë në Bashkimin Evropian.

Ambasadorja Kasnyik theksoi se vijimi i reformave mbetet thelbësor për krijimin e një klime edhe më tërheqëse për investitorët e huaj, duke shtuar se ka një interes në rritje nga investitorë hungarezë për sektorë të ndryshëm në Shqipëri.

Në përfundim të takimit, të dy palët ndanë të njëjtin qëndrim mbi potencialin për thellimin e bashkëpunimit ekonomik mes Shqipërisë dhe Hungarisë, veçanërisht në sektorin financiar dhe në nxitjen e investimeve të huaja në vend.