Hiqen tarifat për bizneset: QKB ndërmerr hapa të reja

Projektligji i propozuar "Për shtesa dhe ndryshime në ligjin për regjistrimin e biznesit" synon të modernizojë dhe përmirësojë procedurat për qytetarët duke ofruar shërbime tërësisht online përmes portalit e-Albania. Ky projektligj synohet të reduktojë kohën e nevojshme për procedurat dhe të lehtësojë aksesin e qytetarëve në shërbimet e regjistrimit të biznesit.

Ndryshimet e propozuara përfshijnë eliminimin e disa tarifave të aplikimit që deri më tani janë paguar nga bizneset, si tarifa për rezervimin e emrit dhe tarifa për transferimin e emrit tek palët e treta. Përveç kësaj, është hequr pagesa për aplikimet për korrigjimin e gabimeve, dhe mënyra e lëshimit të certifikatës për këtë qëllim është rregulluar.

Projektligji parashikon që QKB do të ofrojë shërbimet e regjistrimit të biznesit dhe çdo ndryshim tjetër nëpërmjet sportelit elektronik në platformën e-Albania. Dokumentet do të dorëzohen elektronikisht dhe certifikata e regjistrimit fillestar do të lëshohet vetëm një herë në momentin e miratimit të aplikimit, duke i shkuar subjektit në rrugë elektronike.

Po ashtu, mënyra e lëshimit të ekstrakteve është përcaktuar të bëhet vetëm në format elektronik dhe pa pagesë përmes sportelit elektronik. Emërtimi i shoqërive të bashkimit reciprok është përditësuar në përputhje me ligjin për shoqëritë e bashkëpunimit reciprok.

Projektligji sjell edhe disa ndryshime të tjera lidhur me personat e lejuar të bëjnë aplikimin për regjistrimin fillestar të personave juridikë dhe mënyrën e paraqitjes së dokumentave në aplikim. Gjithashtu, njoftimet për miratimin, pezullimin dhe refuzimin e aplikimeve do të bëhen në mënyrë elektronike.

Në përmbledhje, ky projektligj synon të thjeshtojë dhe modernizojë procesin e regjistrimit të biznesit duke e bërë atë më efikas dhe të përshtatshëm për qytetarët dhe bizneset.