Industria 'Made in Albania' nën rregulla të rrepta, gjobat arrijnë deri në 200 mijë lekë

Bujqësia shqiptare po fokusohet në prodhimin organik për të rritur vlerën e produkteve "Made in Albania" dhe për t’i ofruar ato në treg dhe për eksport në standardet më të larta.

Qeveria ka miratuar projektligjin për "Për prodhimin organik, etiketimin e produkteve organike dhe kontrollin e tyre", i cili përcakton rregullat për produktet organike të prodhuara në Shqipëri. Ligji do të aplikohet për produktet bujqësore, përfshirë akuakulturën, bletarinë dhe produktet e tyre, nga prodhimi deri në import dhe eksport.

Ky ligj synon të forcojë kontrollin mbi prodhimin organik, të rrisë numrin e operatorëve dhe të shtojë besimin e konsumatorëve për produktet e etiketuara si organike. Sipas draftit, përdorimi i OMGJ-ve është i ndaluar në ushqim, ushqim për kafshë, materiale për përpunim, produkte për mbrojtjen e bimëve, plehëruese, përmirësues të tokës dhe mikroorganizma në prodhimin organik.

Kulturat bujqësore organike duhet të prodhohen në tokë natyrore ose në tokë të plehëruar me substanca të lejuara, duke përjashtuar prodhimin hidroponik, i cili nuk lejohet. Për prodhimin blegtoral, ndalohet ky prodhim pa tokë dhe fermerët që duan të prodhojnë kafshë organike duhet të kenë një marrëveshje me një fermer tjetër për përdorimin e tokës, përveç bletarisë.

Zinxhiri i prodhimit organik do të kontrollohet nga trupa certifikues dhe produktet do të etiketohen me logon përkatëse që garanton origjinën organike. Projektligji parashikon gjoba që variojnë nga 10 mijë deri në 200 mijë lekë për shkeljet, ku shuma më e lartë është për përdorimin e OMGJ-ve.