Inflacioni bazë përsërit rritjen për të dytin herë në muajn Gusht

Inflacioni bazë, i llogaritur nga Banka e Shqipërisë, arriti në 2.37% në gusht, nga 2.29% në korrik. Ky indikator përfshin një grup mallrash dhe shërbimesh që përbëjnë 69% të shportës së Indeksit të Çmimeve të Konsumit dhe përjashton produktet me luhatshmëri të lartë, si ushqimet dhe energjinë. Megjithatë, inflacioni bazë është në rënie të ndjeshme në krahasim me të njëjtën periudhë të vitit të kaluar, kur kishte arritur në 4.17%.

Rritja e inflacionit bazë për të dytin muaj radhazi mund të sinjalizojë një rritje të mundshme të presioneve mbi çmimet e shërbimeve, sidomos ato të lidhura me turizmin. Sektori turistik vazhdon të përballet me kosto të larta të punës, që kontribuojnë në rritjen e çmimeve.

Përkundrazi, inflacioni total ka rënë në 2% në gusht, niveli më i ulët për tre vitet e fundit, kryesisht për shkak të uljes së çmimeve të ushqimeve dhe karburanteve dhe forcimit të lekut. Megjithatë, rritja e lehtë e inflacionit bazë në muajt e fundit mund të tregojë se presionet inflacioniste nuk janë ndalur plotësisht.

Bankat qendrore, përfshirë Bankën e Shqipërisë, janë përballur me dilemën e vazhdimit të uljes së normave të interesit gjatë këtij viti. Rezerva Federale amerikane pritet të ulë normën bazë për herë të parë pas dy vjetësh shtrëngimi, dhe të dhënat e fundit nga Eurozona sugjerojnë mundësinë e një ndërhyrjeje të dytë nga Banka Qendrore Europiane.

Në Shqipëri, niveli aktual i inflacionit krijon mundësi për uljen e mëtejshme të normës, por rritja e inflacionit bazë dhe shqetësimet mbi zgjerimin e shpejtë të kreditimit kërkojnë një qasje më të kujdesshme. Këshilli Mbikëqyrës i Bankës së Shqipërisë do të diskutojë politikën monetare në mbledhjen e tij të ardhshme më 2 tetor.