Ministrja e Infrastrukturës dhe Energjisë, Belinda Balluku inspektoi pasditen e sotme punimet për zgjerimin e superstradës Tiranë-Durrës me 3 korsi, plus një korsi emergjence.

Puna aktuale po fokusohet në zgjerimin e rrugës me dy korsi shtesë në secilën anë, ku njëra prej tyre do të dedikohet për emergjenca, duke e bërë autostradën me katër korsi për secilin drejtim pas përfundimit të punimeve.

Balluku theksoi se deri më tani është realizuar 25% e projektit, ndërkohë që janë zhvendosur të gjitha pemët dhe linjat e transmetimit të energjisë elektrike.

“Zgjerimi i autostradës do të lehtësojë qarkullimin e mjeteve veçanërisht në sezonin me fluks të shtuar mjetesh gjatë sezonit veror ku arrin në 106 mijë mjete në 24 orë, gjatë muajit gusht. Gjithashtu ndërtimi i aksit Kashar-Lekaj pritet të shpërndajë qarkullimin për drejtuesit e automjeteve që vijnë nga veriu, të cilët nuk futen në rrugë por vazhdojnë drejt”

Gjithastu ajo shprehu se viti 2025 do të jetë përfundimi i lotëve dhe të para të autostradës Tiranë-Durrës

“Një kapitull i ri për drejtësinë”, e përshkroi Ministri i Drejtësisë, Ulsi Manja, fillimin e Projektit të Binjakëzimit të Shkollës së Magjistraturës. Ky projekt, i cili realizohet në bashkëpunim me Francën, Italinë dhe Holandën, ka si qëllim të sjellë standardet më të larta ndërkombëtare për trajnimet e gjyqtarëve dhe prokurorëve të rinj.

Ministri Manja theksoi rëndësinë e këtij projekti për forcimin e sistemit të drejtësisë në Shqipëri, duke siguruar se pas trajnimeve, gjyqtarët dhe prokurorët do të kenë akses në ekspertizë ndërkombëtare. Ai nënvizoi se një përgatitje e shkëlqyer dhe transparenca janë thelbësore për krijimin e një drejtësie të besueshme dhe efikase.

“Ky është një hap i madh përpara në përpjekjet tona për të ndërtuar një sistem drejtësie që i shërben qytetarëve,” shprehu Manja, duke theksuar angazhimin e qeverisë për të avancuar reformën në drejtësi.

Kreditë afatgjata janë bërë një komponent kryesor i portofolit bankar vitet e fundit, duke shënuar rritje të vazhdueshme në financimet për pasuri të paluajtshme dhe investime të tjera. Kjo tendencë është nxitur nga cikli i lulëzimit të tregut të pasurive të paluajtshme dhe oferta e lartë e bankave në këtë segment.

Sipas të dhënave të Bankës së Shqipërisë, në fund të muajit korrik 2023, pesha e kredisë afatgjatë (me maturim mbi pesë vjet) arriti në 61.1%, një rritje nga 59.7% që kishte qenë në të njëjtën periudhë të vitit të kaluar. Në muajin janar 2024, ky nivel arriti një rekord të ri prej 61.6%.

Në vlerë monetare, portofoli i kredive afatgjata arriti 479 miliardë lekë deri në fund të korrikut 2023, me një rritje prej 16% krahasuar me të njëjtën periudhë të vitit paraardhës.

Rritja e shpejtë e kredisë për pasuri të paluajtshme, veçanërisht gjatë dy viteve të fundit, ka ngritur shqetësime tek Fondi Monetar Ndërkombëtar (FMN). FMN që në janar të 2023 paralajmëroi Bankën e Shqipërisë për rreziqet e kësaj rritjeje, sidomos në segmentin e pasurive të paluajtshme. Për t’iu përgjigjur këtij shqetësimi, në qershor Banka e Shqipërisë rriti kërkesat për kapital duke vendosur për herë të parë një normë kundërciklike për të frenuar rritjen e shpejtë të kreditimit.

Zgjerimi i kredive hipotekare, veçanërisht për individët, ka ndihmuar në shpërndarjen më të mirë të riskut dhe ka kontribuar në rritjen afatgjatë të sektorit bankar. Kreditë hipotekare dhe ato afatgjata në përgjithësi kanë një proces amortizimi të ngadaltë, duke siguruar qëndrueshmëri në rritjen e kredive.

Të dhënat tregojnë gjithashtu se kredia për blerjen e banesave nga individët ka arritur vlerën prej 198 miliardë lekë (rreth dy miliardë euro), me një rritje vjetore prej 16%. Ky segment tashmë përbën më shumë se 26% të portofolit të kredisë për ekonominë.

Kredia për pasuri të paluajtshme dhënë bizneseve po rritet me ritme më të shpejta, duke arritur në 173 miliardë lekë, një rritje prej 60% krahasuar me të njëjtën periudhë të vitit të kaluar.

Në përfundim, orientimi i sektorit bankar drejt kredisë afatgjatë për pasuri të paluajtshme dhe investime të tjera ka ndikuar fuqimisht në rritjen e portofolit të kredisë afatgjatë, duke arritur nivelet më të larta të regjistruara ndonjëherë.