Konsumi i nxitur nga turizmi: tregtia me pakicë arrin rritje prej 5.9% në vit.

Shitjet me pakicë, një tregues kyç për rritjen ekonomike, treguan një ecuri pozitive gjatë tremujorit të dytë të vitit 2024.

Sipas të dhënave më të fundit të INSTAT, indeksi i volumit të shitjeve në tregtinë me pakicë, i bazuar në vlerësimin e indeksit të shitjeve në para, arriti në 110.3, duke shënuar një rritje prej 5.9% krahasuar me të njëjtën periudhë të vitit 2023.

Ky tregues, i përshtatur sezonalisht, shënoi një rritje prej 2.0% në krahasim me tremujorin e parë të vitit 2024.

Një faktor i rëndësishëm që ka ndikuar në këtë rritje është rritja e fluksit të turistëve në vend. Gjatë gjashtëmujorit të parë të vitit, në Shqipëri kanë hyrë 4.5 milionë turistë të huaj, 34% më shumë se në të njëjtën periudhë të vitit të kaluar.

Në tregtinë me pakicë, duke përjashtuar sektorin e hidrokarbureve, volumi i shitjeve në tremujorin e dytë të vitit 2024 është rritur me 6.2% krahasuar me të njëjtën periudhë të vitit 2023.

Në sektorin e ushqimeve, pijeve dhe duhanit, si në dyqane të specializuara ashtu edhe jo të specializuara, volumi i shitjeve u rrit me 5.6% krahasuar me vitin e kaluar. Ndërkohë, shitjet e artikujve jo-ushqimorë u rritën me 6.8% gjatë të njëjtës periudhë.

Sa i përket shitjeve të hidrokarbureve, volumi u rrit me 5.3%, krahasuar me tremujorin e dytë të vitit 2023.

Në rritjen totale prej 5.9% në shitjet me pakicë, grupi i artikujve jo-ushqimorë kontribuoi me 2.7 pikë përqindjeje, ndërsa grupi i ushqimeve, pijeve dhe duhanit shtoi 1.9 pikë përqindjeje. Sektori i hidrokarbureve kontribuoi me 1.3 pikë përqindjeje.

Për tremujorin e dytë të vitit 2024, volumi i shitjeve, duke përjashtuar tregtinë e hidrokarbureve, është rritur me 1.2% krahasuar me tremujorin e parë. Shitjet e ushqimeve, pijeve dhe duhanit u rritën me 1.4%, ndërsa shitjet e artikujve jo-ushqimorë u rritën me 1.2%. Në sektorin e hidrokarbureve, shitjet, të përshtatura sezonalisht, u rritën me 4.8% krahasuar me tremujorin e mëparshëm.