Kostoja e hekurudhës Tiranë - Durrës arrin në 129 milionë euro, pa llogaritur elektrifikim.

Rritja e çmimeve të tregut dhe e disa punime shtesë kanë ndikuar në rritjen e kostove. Komuniteti i Transportit njoftoi se në tremujorin e katërt të 2023, Shqipëria kërkoi kosto shtesë nga BERZH , për të mbuluar këto tre objektiva shtesë:

1.Projekti i zgjerimit të infrastrukturës hekurudhore 4 km nga hyrja e Tiranës në Qendrën e Tiranës (16.1 milionë euro).

2.Ndërtimi i një stacioni të ri përgjatë segmentit ekzistues (11,5 milionë euro).

3.Rregullimi i çmimit i Kontratës së Punës për shkak të rritjes së çmimeve të tregut (29 milionë euro).

Si pjesë e kësaj kontrate, mbi 34,3 km të linjës ekzistuese hekurudhore ndërmjet pikës hyrëse të Tiranës dhe Portit të Durrësit është duke u rehabilituar. Një segment i ri 6.4 km i gjatë po ndërtohet për të lidhur kryeqytetin me Aeroportin Ndërkombëtar të Tiranës.

Ky projekt është identifikuar si një nismë kryesore e Planit të Investimeve për Ballkanin Perëndimor, të cilin Komisioni Europian e publikoi në tetor 2020. Rehabilitimi dhe ndërtimi i linjës hekurudhore prej 40.7 km pritet të përfundojë deri në fund të 2024. Projekti po zhvillohet me mbështetjen kryesore të Bashkimit Europian, i cili ka financuar projektin me një grant investimi prej 35.5 milionë eurosh, ndërsa BERZH ka dhënë një kredi prej 36.9 milionë eurosh, në një total prej 72.4 milionë eurosh.

Duke shtuar koston e tre komponentëve të kërkuar, që së bashku arrijnë në 56.6 milionë euro, totali arrin në 129 milionë euro. Kostoja e përgjithshme e parashikuar e linjës së re do të arrijë në 129 milionë euro, pa përfshirë elektrifikimin. Elektrifikimi do të përcaktohet përmes një kërkese të veçantë nga BERZH.

Linja e re e ndërtuar e Tiranë-Durrës do të kalojë mbi linjën e vjetër, ndërkohë që shtesë do të jetë pjesa e Tiranë-Rinas, një linjë hekurudhore totalisht e re. Projekti përputhet me të gjithë treguesit e rrjetit kryesor të hekurudhave Europiane TEN-T, me përjashtim të elektrifikimit, i cili është planifikuar për fazën e dytë të projektit.