Kredia e re për ekonominë përjetoi një rritje prej 30% në gjysmën e parë të vitit.

Në gjysmën e parë të këtij viti, sektori bankar disbursoi 181.8 miliardë lekë kredi, duke shënuar një rritje vjetore prej afërsisht 30%. Kredia në Lek pati rritjen më të madhe, me 52% krahasuar me të njëjtën periudhë të vitit të kaluar, dhe përbën 59% të totalit të kredisë së re, krahasuar me 50% një vit më parë.

Në qershor, sektori bankar disbursoi 31.2 miliardë lekë kredi të reja, një rritje prej 6.1% krahasuar me të njëjtën periudhë të vitit të kaluar. Bizneset përfituan më shumë nga kjo rritje, me kredinë e re për to që arriti në 128.9 miliardë lekë, një rritje prej 47% krahasuar me vitin e kaluar, ndonëse rritja është ngadalësuar nga 58% në pesëmujorin e kaluar.

Ndërkohë, kreditimi për individët shënoi një rënie prej 4.5% në qershor, por për gjashtëmujorin, u regjistrua një rritje prej 16%, me një total prej 52.7 miliardë lekësh.

Në fund të qershorit, portofoli i kredisë për ekonominë arriti 795.6 miliardë lekë, me një rritje prej afërsisht 13 miliardë lekësh nga maji dhe 11.5% në bazë vjetore. Kredia për individët u rrit me 12.3%, ndërsa për bizneset me 10.7%, me ndikim nga kredia në valutë dhe forcimi i lekut.

Rritja e kreditimit shtyu Bankën e Shqipërisë të vendosë për herë të parë një shtesë kundërciklike mbi raportin e mjaftueshmërisë së kapitalit për sektorin bankar.