Leximtari mbush një vit: mbi 32 mijë lexues dhe tre panaire në horizont për 2026

Libraria Leximtari mbush një vit nga hapja dhe shpall ambiciet e vitit të dytë: tre panaire, platformë online e zgjeruar dhe inovacion në tregtimin e librit shqip.

Një vit nga hapja e saj, libraria Leximtari ka vendosur tashmë një gjurmë të qartë në hartën kulturore të Tiranës. E ngritur në mjediset e "Tirana Ring Center", libraria ka pritur mbi 32 mijë lexues gjatë 12 muajve të parë, ka organizuar rreth 40 takime me autorë dhe ka mbledhur në raftet e saj mbi 5 mijë tituj në një sipërfaqe prej 110 metrash katrorë.

Sot mbi 50 shtëpi botuese nga Shqipëria dhe Kosova tregtojnë botimet e tyre përmes kësaj platforme, ndërsa marrëveshja e nënshkruar me organizatën e shkrimtarëve "Forumi 26" shënon një hap të rëndësishëm drejt institucionalizimit të ekosistemit të librit shqip.

Partneritete dhe ekspansion

Gjatë vitit të parë, Leximtari ka ndërtuar një rrjet partneritetesh strategjike. Bashkëpunimi me Balfin Group solli "Book Fest" në TEG gjatë tetorit, ndërsa nga prilli i këtij viti do të organizohet çdo vit Panairi i Librit në QTU, në kuadër të Ditës Botërore të Librit për Fëmijë dhe Ditës Botërore të Librit.

Në fushën e shërbimeve financiare dhe pagesave online, libraria ka bashkëpunuar me DevPos dhe Pago (Rubicon), ndërsa shpërndarjen fizike të librave në Tiranë, rrethe dhe Kosovë e menaxhon kompania Adex.

Platforma online dhe komuniteti i lexuesve

Leximtari.al numëron tashmë rreth 4 000 tituj të aksesueshëm online, të disponueshëm për këdo brenda dhe jashtë Shqipërisë. Zhvillimi i mëtejshëm i kësaj platforme është një nga prioritetet kryesore të vitit 2026, së bashku me inovacionin në tregtimin dixhital të librit shqip.

Ndërkohë, klubi i librit "Bytes & Books", mbështetur nga Leximtari në partneritet me Gerti Boshnjakun e Business Magazine dhe kërkuesin shkencor Geron Kamberi, vazhdon të jetë një nga iniciativat më aktive të komunitetit.

Objektivat për vitin 2026

Viti i dytë sjell një axhendë ambicioze: konsolidimi i mëtejshëm i librarisë fizike, përmirësimi i përvojës së blerjes online dhe realizimi i tre panaireve të mëdha gjatë vitit. Themeluesit theksojnë se synimi afatgjatë mbetet ndërtimi i bashkësisë më të madhe të lexuesve në Shqipëri.

Pas një viti, sfidat janë më të qarta, misioni më i fokusuar, ndërsa zelli dhe energjia edhe më të mëdha.

— Themeluesit e Leximtari