Manastirliu për buxhetin 2025 : Rritje pagash , investime dhe digjitalizime

Ministrja e Arsimit dhe Sportit, Ogerta Manastirliu, prezantoi sot në Komisionin për Ekonominë dhe Financat dhe në Komisionin për Edukimin dhe Mjetet e Informimit Publik në Kuvend, projektbuxhetin e vitit 2025 për sektorin e Arsimit dhe Sportit. Ky buxhet arrin nivelin më të lartë historik, me një rritje prej 18% krahasuar me vitin 2024.

Projekti synon të mbështesë politikën e rritjes së pagave, të financojë investimet për përmirësimin dhe digjitalizimin e shkollave, të promovojë ndërkombëtarizimin e Arsimit të Lartë dhe të ofrojë mbështetje të zgjeruar për studentët.

Buxheti2025 për Arsimin dhe Sportin përfshin:

• Financimin e 40 objekteve të reja arsimore.
• Libra falas për 250,000 nxënës.
• Transport falas për 50,000 nxënës dhe mësues.
• Trajnime të fokusuara në Gjuhën Shqipe, Teknologjinë Informatike dhe Shkencat për 16,000 mësues.
• Mbështetje për 100 projekte të kërkimit shkencor dhe inovacionit.
• Bursa dhe lehtësime tarifash për 50,000 studentë.
• Përfshirjen e 11,000 nxënësve në ekipe sportive shkollore.

Ky buxhet për Arsimin dhe Sportin ka për qëllim të forcojë cilësinë e arsimit, të nxisë inovacionin dhe të krijojë më shumë mundësi për nxënësit dhe studentët shqiptarë.