Marrëveshje e re me BEI për financimin e linjës hekurudhore Durrës-Rrogozhinë

Sot në Tiranë, zëvendëskryeministrja dhe ministrja e Infrastrukturës dhe Energjisë, Belinda Balluku, bashkë me drejtorin e Bankës Europiane për Investime, Lionel Rapaille, nënshkruan marrëveshjen për financimin e hekurudhës Durrës–Rrogozhinë. Ky projekt strategjik, pjesë e Korridorit VIII, do të përbëjë një lidhje të rëndësishme për Shqipërinë, duke e integruar atë në rrjetin europian të transportit dhe duke forcuar pozicionin e saj si qendër logjistike në rajon.

Marrëveshja u nënshkrua gjatë vizitës së Përfaqësueses së Lartë të Politikës së Jashtme të BE-së, Kaja Kallas, e cila sot po viziton Shqipërinë në takim me Kryeministrin Edi Rama.

Ky nënshkrim përfaqëson një hap tjetër strategjik në rrugën e modernizimit të infrastrukturës shqiptare. Hekurudha Durrës-Rrogozhinë, si segment kyç i Korridorit VIII, luan një rol kritik në sistemin e transportit rajonal, veçanërisht për shkak të pozicionit të Rrogozhinës si pikë kryesore e ndarjes së trafikut hekurudhor. Kjo projekt nuk thellon vetëm lidhjet e Shqipërisë me rrjetin evropian, por e forcon edhe rolin e saj si nyje logjistike në Ballkan.