Ministrja Bora Muzhaqi njofton bashkëpunimin me Fibank Albania për aplikacionin edukativ bankar për të rinjtë

Në një takim të fundit me përfaqësuesit e Fibank Albania, Ministrja e Shtetit për Rininë dhe Fëmijët diskutoi nismën më të re për të sjellë një aplikacion inovativ për të rinjtë shqiptarë. Qëllimi i këtij projekti është të ofrojë edukim financiar praktik përmes një platforme interaktive, që u mundëson të rinjve të mësojnë mbi transaksionet bankare, duke përfshirë menaxhimin e të ardhurave, shpenzimeve dhe kursimeve, si dhe bazat e investimeve.

Krahas një fotoje që ndau në rrjetet sociale, Ministrja shpjegoi se aplikacioni do të pilotohet fillimisht në dy shkolla të mesme, duke i lejuar nxënësit të fitojnë aftësi të vlefshme për menaxhimin financiar personal përmes simulimeve praktike. Ky projekt synon të rrisë ndërgjegjësimin dhe njohuritë e të rinjve në lidhje me funksionet bankare dhe mënyrat e menaxhimit të parave, duke i përgatitur ata për sfidat financiare që mund të hasin në jetën e përditshme.

Përveç dijeve, aplikacioni do t’u ofrojë nxënësve të përzgjedhur edhe shpërblime monetare për përparimin e tyre dhe angazhimin në aktivitete të ndryshme brenda aplikacionit. Kjo iniciativ do të shërbejë si një motivim shtesë për të nxitur përfshirjen e plotë dhe angazhimin maksimal të pjesëmarrësve.

"Pilotimi fillon së shpejti në dy shkolla të mesme, dhe të rinjtë pjesëmarrës do të fitojnë jo vetëm dije të vlefshme, por edhe shpërblime monetare!,” deklaroi Ministrja.

Projekti është një shembull i përpjekjeve të vazhdueshme të Ministrisë për të modernizuar mësimin dhe për të integruar teknologjinë në jetën e përditshme të të rinjve, ndërkohë që kontribuon në zhvillimin e tyre personal dhe profesional.