Nancy VanHorn në Vlorë , takim me Drejtorin Rajonal të Agjencisë së Mbikëqyrjes Policore, Glodian Ahmetaj dhe studentët e Fakultetit të Drejtësisë "Ismail Qemali"

E Ngarkuara me Punë Nancy VanHorn vazhdon nismën e saj jashtë Tiranës , duke vizituar këtë herë qytetin e Vlorës. Në kuadër të këtij udhëtimi, znj. VanHorn zhvilloi një takim me Drejtorin Rajonal të Agjencisë së Mbikëqyrjes Policore, Glodian Ahmetaj, dhe studentë të Fakultetit të Drejtësisë në Universitetin "Ismail Qemali".

Gjatë takimit, znj. VanHorn theksoi rëndësinë e angazhimit të komunitetit për ndërtimin e një besimi të qëndrueshëm publik. Ajo vuri në dukje se kjo është thelbësore për forcimin e përpjekjeve vendore në zbatimin e ligjit dhe luftën kundër korrupsionit.

Një ndër temat kryesore të diskutimit ishte bashkëpunimi ndërmjet institucioneve vendore dhe komunitetit për të adresuar sfidat kryesore në fushën e drejtësisë dhe qeverisjes së mirë. Ky takim përfaqëson një hap të rëndësishëm në thellimin e lidhjeve mes qytetarëve dhe autoriteteve për ndërtimin e një të ardhmeje më të drejtë dhe transparente.

Vizita në Vlorë nënvizon angazhimin e vazhdueshëm të znj. VanHorn për të forcuar dialogun dhe bashkëpunimin përtej kryeqytetit, duke sjellë vëmendje ndaj iniciativave që mbështesin transparencën dhe zhvillimin e qëndrueshëm në të gjitha rajonet e Shqipërisë.

"Një nga djemtë e mi është në fakt një student i drejtësisë, ashtu si ju. Jam shumë e emocionuar sepse kur të flas sonte me të, do të kem mundësinë t’i tregoj për bashkëbisedimin tonë sot. Sepse për mua, është me të vërtetë një shenjë shprese për të ardhmen e Shqipërisë që ka kaq shumë prej jush sot këtu për të biseduar me kolegë nga forcat e rendit mbi rolin e zbatimit të ligjit në komunitetin tuaj. Rrugës për në Vlorë këtë mëngjes, po flisja me një nga kolegët e mi të ambasadës dhe tema e diskutimit tonë, një nga temat kryesore ishte: si mund ta ndihmojmë Shqipërinë të ndërtojë një kulturë të vërtetë integriteti dhe një kulturë ku ligji është në qendër të jetës, jo vetëm në universitete, jo vetëm në zyrat e policisë, por pjesë e asaj që bëjmë çdo ditë. Sepse janë vendimet e përditshme që merrni, ato të cilat e ndërtojnë këtë kulturë."