Në qershor, do të hapet rruga e re Thumanë-Kashar, e cila për herë të parë në Shqipëri, është rrugë e kategorisë A dhe pjesë e Korridorit Blu.

Zëvendëskryeministrja dhe ministrja e Infrastrukturës, Belinda Balluku, njoftoi se brenda muajit qershor do të ketë zhvillime të rëndësishme për segmentet e tjera të Korridorit Blu, gjatë inspektimit të autostradës së re , me kryeministrin Edi Rama.

"Kemi caktuar datën 30 qershor si afat për firmën ndërtuese. Po punojmë me 12 ekipe shtruese. Pjesa më sfiduese tani është lidhja e nyjes së Kasharit, që është në fazën përfundimtare të konstruksionit, ndërkohë që më shumë se 21 km kanë përfunduar pjesën e stabilizantit," tha Balluku.

Segmenti rrugor i ri do të mundësojë edhe kthimin në Rinas dhe hyrjen e Kasharit, duke shpërndarë trafikun nga autostrada Tiranë-Durrës. Gjithashtu, është në përfundim negociata për gjurmën nga Kashari deri në Lekaj, duke e lidhur atë me gjurmën e re.

Balluku theksoi se janë tre kontrata që do të nënshkruhen këtë muaj për akset Kashar-Lekaj, Lekaj-Fier dhe Thumanë-Milot. Nënshkrimi i këtyre kontratave do të hapë rrugën për nisjen e punimeve. Ndërkohë, është në përgatitje hapja e garës për aksin Milot-Balldren dhe më pas për aksin Balldren-Muriqan, duke kompletuar Korridorin Blu.

Për segmentin Milot-Balldren, studimi i fizibilitetit është përfunduar dhe është gati për të filluar punimet. Kjo është autostrada e parë e kategorisë A në Shqipëri dhe do të ndiqet nga autostrada të tjera.

Ndërkohë, financimet për realizimin e Korridorit VIII Durrës-Pogradec do të vazhdojnë paralelisht, duke mundësuar lidhjen me rrjetin europian të transportit Lindje-Perëndim dhe përmbushjen e skeletit të infrastrukturës rrugore të Shqipërisë deri në vitin 2030, në përgatitje për anëtarësimin në Bashkimin Europian.

"Kemi pasur një gjeologji të mirë dhe jo problematike në këtë segment. Nëse vazhdojmë me këto ritme, besojmë se edhe segmentet e tjera do të përfundojnë brenda afateve," përfundoi Balluku.