Nga 72 mijë kërkesa për kredi, 25% u refuzuan: Toleranca e bankave ndaj bizneseve rritet

Gjatë gjysmës së parë të vitit, janë regjistruar gjithsej 72,418 aplikime për kredi nga individë dhe biznese, nga të cilat 25% u refuzuan nga bankat.

Numri total i aplikimeve për kredi të shqyrtuara nga bankat është rritur me 11.4% krahasuar me vitin e kaluar. Bizneset e vogla dhe të mesme kanë shfaqur një rritje më të madhe në kërkesat për kredi në krahasim me individët. Megjithatë, 10% e aplikimeve për kredi i përkasin ndërmarrjeve, ndërsa 90% i takojnë individëve.

Refuzimet më të shumta kanë ndodhur për kreditë e kërkuara nga individët, ndërsa për bizneset e vogla dhe të mesme, si dhe për ndërmarrjet e tjera, norma e refuzimit ka shfaqur një rënie.

Gjatë kësaj periudhe, dy grupet e bankave kanë treguar qëndrime të ndryshme ndaj kërkesave për kredi të "bizneseve të vogla dhe të mesme" dhe ndaj individëve. Bankat vendase kanë pasur një qasje më lehtësuese, duke refuzuar përkatësisht vetëm 4% dhe 6% të aplikimeve, ndërsa bankat e huaja kanë rritur normën e refuzimit në 7% dhe 34%.

Konkretisht, norma e refuzimit është rritur, duke arritur 2.7 pikë përqindje më shumë se vitin e kaluar. Bankat me kapital të huaj në Shqipëri kanë refuzuar më shumë aplikime për kredi në krahasim me ato me kapital vendas.

Në të njëjtën kohë, të dy grupet e bankave duket se ndajnë preferenca të ngjashme për bizneset e mëdha, duke refuzuar vetëm 3% të kërkesave të tyre.

Rreth 5.7% e aplikimeve, ose 4,093, janë bërë nga ndërmarrjet e vogla dhe të mesme, ndërsa 3.6% ose 2,596 aplikime vijnë nga ndërmarrjet e tjera. Nga ana tjetër, individët kanë paraqitur 65,729 aplikime gjithsej.