Për 8 muaj, transfertat kombëtare në euro rriten me 34%

Krijimi i një sistemi kombëtar për transfertat në euro ka ndikuar ndjeshëm në uljen e kostove të këtyre operacioneve. Përpara këtij sistemi, transfertat kombëtare në euro kryheshin përmes llogarive që bankat shqiptare kishin në banka korrespondente jashtë vendit, gjë që shkaktonte vonesa dhe kosto shumë më të larta. Sistemi i ri AIPS Euro ka përcaktuar gjithashtu kufizime për komisionet që bankat mund të ngarkojnë klientëve të tyre, duke rritur efikasitetin dhe ulur kostot e transaksioneve.

Rritja e transaksioneve në euro është një tregues i përdorimit gjithnjë e më të madh të kanaleve bankare për kryerjen e pagesave dhe transfertave në përgjithësi. Përmes sistemit AIPS Euro, për tetë muajt e parë të vitit 2024 janë kryer mbi 206 mijë transferta kombëtare në euro, sipas të dhënave nga Banka e Shqipërisë.

Në krahasim me periudhën e njëjtë të vitit të kaluar, transfertat në euro janë rritur me 34%, ndërsa rritja në vlerën e transaksioneve ka qenë pothuajse në të njëjtin nivel. Për tetëmujorin e këtij viti, vlera e transaksioneve ka arritur në 3.3 miliardë euro, një rritje prej 32% në krahasim me periudhën e njëjtë të vitit 2023.

Rritja e përdorimit të euros në transaksionet e brendshme ekonomike është një shenjë e euroizimit të lartë të ekonomisë shqiptare. Ky fenomen reflektohet edhe në depozitat bankare në monedhën europiane, të cilat në fund të korrikut 2024 arritën një rekord historik prej 7.63 miliardë euro, me një rritje prej 12% krahasuar me të njëjtën periudhë të vitit të kaluar.

Këto rritje tregojnë gjithashtu shtimin e valutës që qarkullon në sektorin bankar shqiptar. Për transfertat në euro deri në 10 mijë euro, komisionet nuk duhet të tejkalojnë 0.2% të vlerës së transferuar për pagesat e bëra në degë dhe 0.1% për ato elektronike, ndërsa totali i komisioneve për çdo transfertë nuk duhet të kalojë 50 euro. Për fondet e mbërritura nuk aplikohen komisione.