Përfitimet financiare të SEPA: 100 milionë euro kursime në remitanca

Dy ditë më parë, Banka Qendrore dorëzoi zyrtarisht kërkesën për anëtarësimin e Shqipërisë në SEPA, duke e bërë Shqipërinë vendin e parë në rajon që përfundon me sukses këtë fazë të integrimit në tregun evropian të pagesave. Në një takim të organizuar nga Banka e Shqipërisë, përfaqësuesi i Bankës Botërore, Matija Laco, theksoi përfitimet ekonomike që do të kenë familjet dhe bizneset shqiptare nga ky anëtarësim.

Guvernatori Gent Sejko deklaroi se anëtarësimi në SEPA do të mundësojë që qytetarët dhe bizneset shqiptare të kryejnë pagesa dhe transferta me të njëjtat kushte si qytetarët e Bashkimit Evropian. "Ky anëtarësim do të garantojë trajtim të barabartë për shtetasit shqiptarë dhe ata evropianë në fushën e pagesave," tha ai.

Matija Laco theksoi se kalimi në pagesa digjitale mund të shtojë 1% të PBB-së së Shqipërisë. Sistemi i modernizuar i pagesave do të përmirësojë remitancat, duke lejuar emigrantët shqiptarë dhe familjet e tyre të kursejnë rreth 100 milionë euro në kosto remitancash, me ulje të tarifave prej 3%. Ai shtoi se kjo do të sjellë jo vetëm kursime, por edhe një rritje të flukseve financiare që hyjnë në Shqipëri.

Për bizneset shqiptare, përfitimet janë të konsiderueshme: kursime dhjetëfish për një transaksion prej 5000 euro dhe deri në 17 herë më shumë për vlera më të larta.

Sejko gjithashtu theksoi se përmbushja e këtij objektivi është një hap i rëndësishëm drejt realizimit të angazhimeve në kuadër të Planit të ri të Rritjes për Ballkanin Perëndimor. Ky plan do të mundësojë që Shqipëria të përfitojë nga fondet e disponueshme dhe të krijojë një rrugë më të qëndrueshme drejt anëtarësimit në Bashkimin Evropian deri në vitin 2030.

Anëtarësimi në SEPA do të sjellë përfitime të shumta për Shqipërinë, jo vetëm në procesin e integrimit në familjen e madhe evropiane, por edhe për ekonominë shqiptare në fusha të ndryshme si tregtia, turizmi dhe investimet direkte.