Projekti 55 mln USD për ndërtimin e urave, punimet fillojnë brenda 6-8 muajve.

Projekti "Ndërtimi i urave të qëndrueshme" është një iniciativë që mori formë në dhjetor të vitit të kaluar, me një kredi prej 55 milionë dollarësh. Aktualisht, pritet që punimet konkrete në terren të fillojnë brenda 6-8 muajve të ardhshëm.

Sipas një raporti të fundit nga ekipi i Bankës Botërore, implementimi i përgjithshëm i projektit është vlerësuar si "i kënaqshëm në mënyrë të moderuar," një përkeqësim krahasuar me vlerësimin e mëparshëm "i kënaqshëm." Megjithatë, sfidat fillestare që ka hasur projekti duket se janë tejkaluar, duke e vendosur atë në rrugën e duhur për realizim.

Projekti i Shqipërisë "Ndërtimi i Urave të Qëndrueshme" është në fazat e hershme të zbatimit, pasi u shpall efektiv më 1 dhjetor 2023. Në raport thuhet se urat e Viroit dhe Beshirit janë parashikuar të jenë ndër të parat që do të fillojnë ndërtimin brenda 6-8 muajve të ardhshëm.

Deri më tani, janë disbursuar 1.97 milionë dollarë, që përbëjnë 3.59% të totalit prej 55 milionë USD të siguruara nga Banka Ndërkombëtare për Rindërtim dhe Zhvillim. Përveç kësaj kredie, projekti parashikon dhe fonde buxhetore për ndërhyrje në një numër më të madh urash të ndara në dy grupe.

Në fillim të këtij viti, Autoriteti Rrugor Shqiptar hapi procedurat për ndërtimin e Urës së Viroit, e cila lidh Gjirokastrën me Tepelenën. Plani i projektit përfshin kalimin e rrugës ekzistuese në një rrugë të kategorisë C2 me korsi 2x 3.5 metra, duke ruajtur urën ekzistuese si një shëtitore panoramike.

Gjithashtu, projekti synon të garantojë sigurinë ndaj përmbytjeve për këtë kategori rruge, duke e bërë atë më të qëndrueshme ndaj vërshimeve të ujërave. Ky projekt është rezultat i një negociate disa vite më parë me Bankën Botërore, duke marrë parasysh nevojat emergjente për ndërhyrje në ura të ndryshme në të gjithë vendin.

Dokumenti i projektit specifikon se janë identifikuar 80 ura me përparësi, të cilat do të kërkojnë ndërhyrje brenda shtatë viteve të ardhshme, për të përmirësuar qarkullimin e trafikut që varion nga 100 deri në 2500 mjete në ditë.