Qershori solli një ngadalësim të kredive për shtëpi, por ato ende qëndrojnë në vlerat rekord

Kredia për shtëpi u ngadalësua në qershor. Sipas Bankës së Shqipërisë, sektori bankar dha rreth 4.6 miliard lekë kredi të reja për shtëpi, një rënie prej 0.7% krahasuar me vitin e kaluar. Për gjashtë muajt e parë të vitit, kredia e re për shtëpi arriti në 27.5 miliard lekë, duke u rritur me 13.3% krahasuar me të njëjtën periudhë të vitit të kaluar.

Kredia e re në lekë është rritur me 77% krahasuar me gjashtë muajt e parë të vitit të kaluar, duke arritur nivelet më të larta historike. 73% e kredisë së re për shtëpi këtë vit është dhënë në monedhën vendase.

Norma mesatare e interesit të portofolit të kredisë për blerje banesash në lekë për majin ishte 4.59%, nga 5.21% një vit më parë. Ndërkohë, kredia në euro u tkurr me 43% për gjashtë muajt e parë të vitit.

Portofoli aktiv i kredisë për blerjen e banesave arriti në 196.2 miliard lekë, duke përbërë 25% të kredisë totale për ekonominë shqiptare. Kredia e dhënë nga sektori bankar vazhdon të mbështesë tregun e pasurive të paluajtshme.

Fondi Monetar Ndërkombëtar sugjeroi vendosjen e një shtese kundërciklike kapitali për sektorin bankar. Banka e Shqipërisë reagoi duke aplikuar një shtesë kundërciklike prej 0.25 pikë përqind, e cila do të hyjë në fuqi më 30 qershor 2025.