Qeveria merr një vlerësim negativ nga Auditi Financiar për menaxhimin e investimeve publike.

Qeveria mori një vlerësim të dobët për menaxhimin e investimeve publike sipas buxhetit të miratuar nga Kuvendi për vitin 2023.

Për vitin 2023, treguesi "Realizimi i shpenzimeve kapitale" u vlerësua me 2 pikë (50%), duke treguar një performancë mesatare dhe një rënie krahasuar me vitin 2022 (2.7 pikë, 67%).

Njësitë me performancë të ulët në këtë tregues përballen kryesisht me probleme në procedurat e prokurimit.

Një tjetër tregues kyç është "Investimet kapitale shumëvjeçare të hedhura në sistem sipas planit kontraktual të disbursimit". Për vitin 2023, ky tregues u vlerësua me 2.54 pikë (63%), një rënie nga 3.15 pikë (79%) në vitin 2022.

Drejtoria e Kontrollit vuri re se disa njësi kanë probleme me parashikimin e fondeve në fillim të vitit buxhetor, duke shkaktuar devijime në planet buxhetore. Rishikimi i buxhetit shpesh përfshin kalimin e fondeve nga projekte me ecuri të ulët në ato me ecuri të lartë, për shkak të planifikimit të gabuar dhe mosparashikimit të faktorëve që pengojnë realizimin e projekteve.

Investimet publike vuajnë nga mosrealizimi i planit dhe përqendrimi i alokimeve në muajt e fundit të vitit. Gjatë dhjetorit 2023, Ministria e Financave raportoi pagesa prej 430 milionë eurosh për investime publike, që përbënin 38% të fondit vjetor prej 118 miliardë lekësh (1.1 miliardë euro). Nga 135 miliardë lekë të planifikuara për vitin 2023, u realizuan vetëm 118 miliardë lekë, ose 12% më pak se plani.