Sasia e lekëve jashtë bankave në Shqipëri arrin në 395 miliardë, duke thyer rekordin

Në muajin qershor të këtij viti, Shqipëria ka arritur një rekord të ri për shumën e parave që qarkullojnë jashtë sektorit bankar. Sipas të dhënave të Bankës së Shqipërisë, më shumë se 395 miliardë lekë ishin jashtë bankave, një rritje prej mbi 7 miliardë lekësh në krahasim me janarin e këtij viti.

Në ekonominë shqiptare, përdorimi i parave fizike është shumë i përhapur, duke lejuar blerjen e një sërë produktesh dhe mallrash, nga ushqimet e përditshme deri te mjetet dhe prona të kushtueshme. Megjithatë, kjo situatë krijon mundësi për informalitet dhe e vështirëson luftën kundër pastrimit të parave, duke pasur një ndikim negativ në ekonomi për shkak të qarkullimit të pakontrolluar të parasë.

Ka pasur diskutime të vazhdueshme për kufizimin e përdorimit të parasë cash, por ende nuk ka një vendimmarrje të qartë. Tani, bizneset janë të detyruara të kryejnë pagesat mbi 150 mijë lekë përmes rrugëve bankare, ndërsa për individët nuk ka kufizime të tillë.

Banka Qendrore thekson se, ndonëse përdorimi i pagesave elektronike është në rritje, është e nevojshme një bashkëpunim më i ngushtë ndërmjet institucioneve për të ulur përdorimin e parasë fizike. "Përdorimi i parasë fizike mbetet dominues në ekonominë shqiptare dhe sjell kosto të larta për të. Koordinimi i përpjekjeve me aktorët relevantë dhe rritja e edukimit financiar për nxitjen e përdorimit të instrumenteve më efikas dhe me kosto të ulët janë prioritetet kryesore të Bankës së Shqipërisë," thuhet në raportin vjetor të bankës.