Shqipëria dhe Turqia forcojnë bashkëpunimin në sektorin e bujqësisë - Denaj nënshkruan Deklaratën për Sigurimet në Bujqësi me homologun turk

Ministrja e Bujqësisë dhe Zhvillimit Rural të Shqipërisë, Anila Denaj, ka firmosur me homologun turk, Ibrahim YUMAKLI, deklaratën “Mbi bashkëpunimin në fushën e sigurimeve në bujqësi,” duke hapur një kapitull të ri në forcimin e marrëdhënieve bilaterale në këtë sektor.

Kjo deklaratë synon të sjellë një model të ri sigurimesh për bujqësinë shqiptare, i frymëzuar nga Fondi i Sigurimeve Bujqësore të Turqisë (TARSIM). Ky bashkëpunim pritet të sjellë përfitime të dukshme për fermerët shqiptarë, duke ofruar një mbështetje më të fuqishme financiare dhe një ambient më të qëndrueshëm për bujqësinë.

Përmes kësaj marrëveshjeje, krijohet një platformë e re për shkëmbime institucionale dhe për thellimin e bashkëpunimit në sektorin e sigurimeve në bujqësi, me synim zhvillimin e qëndrueshëm të sektorit bujqësor në Shqipëri.

Ministrja Denaj nënvizon se kjo marrëveshje është thelbësore për të garantuar mbështetjen e nevojshme për fermerët dhe për t'i ndihmuar ata në përballimin e sfidave të sektorit. Ajo gjithashtu shpreh optimizmin se kjo iniciativë do të forcojë zhvillimin rural në Shqipëri, duke krijuar mundësi të reja për përfitime konkrete.