Takimi i Bordit të Shoqatës Shqiptare të Tregtisë Elektronike - AECA: Strategji dhe Plane për të Ardhmen e E-Commerce në Shqipëri

Më datë 22.01.2025 Bordi i Shoqatës Shqiptare E-Commerce (AECA) u mblodh për të diskutuar dhe planifikuar temat kryesore që do të udhëheqin rrugën drejt një industrie më të fuqishme dhe të qëndrueshme të tregtisë elektronike në Shqipëri. Takimi ishte i fokusuar në çështje strategjike, projekte inovative dhe përfshirjen e gjerë të komunitetit të biznesit dhe të rinjve.

Çështjet kryesore të diskutuara

1. Action Plan dhe implementimi i tij
   Bordi rishikoi planin strategjik të veprimit të tregtisë elektronike, duke përcaktuar hapa të qartë për implementimin e tij. Ky plan përmban iniciativat kryesore që do të përmirësojnë ekosistemin e e-commerce në vend, duke përfshirë inovacionin teknologjik, përfshirjen e më shumë bizneseve dhe rritjen e besimit të konsumatorëve.
2. Trust Mark – Ndërtimi i besimit në tregtinë elektronike
   Një nga pikat kryesore ishte avancimi në zbatimin e "Trust Mark", një iniciativë që synon të vendosë standarde të larta sigurie dhe cilësie për bizneset online në Shqipëri. Ky projekt është një hap i rëndësishëm drejt ndërtimit të një tregu më të besueshëm dhe më të sigurt për të gjithë aktorët.
3. Akseleratori me studentët dhe bashkëpunimi me Universitetet
   Me mbi 500 aplikime deri më tani, Akseleratori për studentët po kthehet në një histori suksesi. Ky program synon të fuqizojë talentin e ri dhe t’i japë mundësi studentëve të eksplorojnë botën e e-commerce përmes ideve inovative dhe trajnimeve praktike. Ky numër i madh aplikimesh tregon interesin e madh të të rinjve shqiptarë për këtë fushë në zhvillim.
4. Anëtarësimet e reja dhe ulja e kuotave të anëtarësimit
   Në fokus ishte edhe strategjia për të rritur komunitetin e AECA, duke ulur kuotat e anëtarësimit për të bërë pjesëmarrjen më të aksesueshme për bizneset e reja. Ky hap synon të përfshijë më shumë aktorë dhe të krijojë një rrjet më të gjerë bashkëpunimi në industrinë e tregtisë elektronike.
5. Mbledhja e ardhshme e Asamblesë së Anëtarëve
   U caktua data 11 shkurt për mbledhjen e radhës të Asamblesë së Anëtarëve të AECA. Ky takim do të jetë një moment i rëndësishëm për të diskutuar rezultatet e arritura në këto 3 vite, për të marrë vendime strategjike dhe për të përfshirë më shumë zëra në vendimmarrje.

Përkushtimi ndaj zhvillimit dhe inovacionit

Takimi i Bordit të AECA nënvizoi rëndësinë e bashkëpunimit dhe përkushtimit ndaj zhvillimit të industrisë së e-commerce në Shqipëri. Duke u fokusuar në projekte konkrete dhe duke inkurajuar pjesëmarrjen e komunitetit, AECA vazhdon të jetë një forcë kryesore për inovacion dhe zhvillim te sektorit e-commerce.

Ftojmë të gjitha bizneset dhe profesionistët që aspirojnë të jenë pjesë aktive e kësaj nisme me ndikim, të bashkohen me ne për të ndërtuar së bashku të ardhmen e e-commerce në Shqipëri