Tenderi për projektin e hekurudhës Vore-Hani i Hotit, vlerësohet në 356 milionë euro

Hekurudhat Shqiptare kanë njoftuar se më 1 gusht do të hapet tenderi për rehabilitimin e linjës Vorë-Hani i Hotit, duke përfshirë furnizime, punime dhe konsulencë. Ky projekt, i cili është pjesë e zgjerimit të Rrjetit Kryesor të Transportit Trans-Europian TEN-T në Ballkanin Perëndimor, synon të lidhë Shqipërinë me rrjetet hekurudhore rajonale dhe europiane.

Financimi për projektin vjen nga grantet e WBIF (160 milionë euro), kreditë nga BERZH (100 milionë euro) dhe BEI (100 milionë euro), duke e çuar vlerën totale në 356 milionë euro. Linja hekurudhore 120.2 km kalon përmes shtatë bashkive dhe është pika e vetme lidhëse hekurudhore e Shqipërisë me vendet fqinje.

Prokurimi do të kryhet përmes Portalit të E-Prokurimit të Klientit të BERZH-it (ECEPP). Linja ekzistuese u ndërtua në dy faza: nga Vora në Laç në fillim të viteve 1960 dhe nga Laçi deri në kufirin me Malin e Zi në vitin 1985. Tërmeti i 29 nëntorit 2019 ndërpreu funksionimin e linjës për shkak të dëmtimit të urës mbi lumin Ishëm.