Yield-i i bonove 12-mujore afron me normën bazë të interesit, në minimumin e tij

Norma mesatare e interesit për bonot e thesarit me maturim 12-mujor ka arritur një nivel minimal të ri. Në ankandin e fundit, yield-i mesatar i ponderuar zbriti në 3,17%, duke shënuar një rënie të lehtë krahasuar me ankandin e mëparshëm, ku ishte 3,19%. Ky nivel i ri e vendos yield-in fare pranë normës bazë të interesit prej 3%.

Sipas të dhënave nga Banka e Shqipërisë, kërkesa e investitorëve për këto bono ishte e lartë, duke arritur mbi 9 miliardë lekë, nga të cilat vetëm 7,3 miliardë lekë u pranuan. Rënia e yield-it të bonove 12-mujore reflekton uljen e inflacionit, i cili, sipas INSTAT, u regjistrua në 2,1% në bazë vjetore për muajin korrik.

Kjo rënie në yield sugjeron kosto më të ulëta për huamarrjen në lekë, çka ndikon pozitivisht në zgjerimin e kredidhënies bankare. Nga ana tjetër, kjo i mundëson qeverisë të financojë borxhin e brendshëm me kosto më të ulët.

Ministria e Financave ka planifikuar që gjatë periudhës korrik-shtator të zhvillojë 19 ankande për bono thesari dhe obligacione, duke synuar të sigurojë një hua prej 74,6 miliardë lekësh në tregun e brendshëm. Kjo periudhë, e cila përkon me pushimet verore, ka një fokus më të madh tek obligacionet.

Në këtë vit, qeveria planifikon të marrë pjesën më të madhe të borxhit publik në tregun e brendshëm përmes bonove të thesarit dhe obligacioneve. Sipas planit vjetor të huamarrjes, totali i emetimeve të planifikuara për këtë vit pritet të arrijë rreth 378.64 miliardë lekë.

Investimi në tituj qeveritarë vazhdon të konsiderohet si një nga opsionet më të sigurta për investitorët në vend.